VIDEO | Dortmundi di vetëm të mrekullojë, përmbys Bajernin dhe blindon kreun

0

Dortmundi vijon të jetë fantastik këtë sezon dhe duket se nuk ka ndërmend ta ndalë hapin. Triumfon ndaj Bajernit me përmbysje dhe i jep një goditje të fortë njëkohësisht kampionëve aktual. Protagonist absolut Marko Rojs me dy gola dhe më pas i zakonshmi Alkaser lë shenjën e tij. Tashmë Dortmundi e çon diferencën me Bajernin në 7 pikë.
Pjesa e parë u dominua thuajse e gjitha nga bavarezët, të cilët arritën dhe të shënonin në minutën e 26-të, me anë të ish-it, Robert Levandovski. Ishte Gnabri, i cili arriti të kalojë mjaft mirë nga e djathta dhe të japë një krosim perfekt për polakun, i cili shumë pranë portës nuk mund të gabonte. Skuadrat iu drejtuan dhomave të zhveshjes me rezultatin 0-1.
Fraksioni i dytë nisi me gol. Marko Rojs fiton një penallti dhe e transformon vetë në gol, duke baraspeshuar shifrat, pas vetëm katër minutave lojë nga pjesa e dytë. Gjithsesi, gëzimi në shkallët e “Signal Iduna Park” nuk zgjati shumë. Levandovski shënoi për herë të dytë, duke dërguar përsëri në avantazh ekipin e tij në minutën e 53-të.
Në minutën e 67-të, Dortmund u rifut përsëri në lojë për përmbysjen, teksa Rojs shënoi një supergol me një goditje fluturimthi. Më pas, shtatë minuta më vonë, ishte Pako Alkaser, i cili plotësoi përmbysjen e madhe. Verdhezinjtë rezistuan deri në fund, duke marrë kështu një sukses spektakolar. Te Bajerni tashmë gjërat duken akoma më keq dhe ndoshta Niko Kovaç mund të jetë në qendër të kritikave.

You might also like More from author

error: As mos e mendo :P
%d bloggers like this: